رمضان المبارک ….. رحمت، مغفرت اور نجات کا مہینہ

تحریر …. علامہ مشتاق احمد کمبوہ، محمدی مولائی
رمضان المبارک اسلامی سال کا نواں مہینہ اور برکتوں، رحمتوں اور مغفرت کا مہینہ ہے۔ یہ وہ وقت ہے جب اللہ تعالیٰ کی خاص رحمتیں نازل ہوتی ہیں، او ر بندے کو اپنے گناہوں کی معافی مانگنے، روحا نی ترقی حاصل کرنے اور نیکیوں میں سبقت لے جانے کا بہترین موقع ملتا ہے۔ روزہ محض بھوک اور پیاس کا نام نہیں بلکہ یہ ایک مکمل عبادت ہے جو ہمارے جسم، روح اور اخلاق پر گہرے اثرات مرتب کرتی ہے۔ رمضان کا سب سے بڑا انعام اللہ تعالیٰ کا قرب ہے، جو ہمارے دلوں کو تقویٰ، صبر، شکر اور عاجزی سے بھر دیتا ہے۔ روزے کے ذریعے انسان اپنی نفسانی خواہشات کو قابو میں رکھنا سیکھتا ہے ….. جس سے اس کا کردار سنورتا ہے ….. اور غیبت، جھوٹ، حسد اور بد گمانی جیسی برائیاں کمزور پڑ جاتی ہیں۔ احادیث مبارکہ کے مطابق رمضان کے آغاز پر جنت کے دروازے کھول دیئے جاتے ہیں اور جہنم کے دروازے بند کر دیئے جاتے ہیں۔ نیکیوں کا اجر کئی گنا بڑھا دیا جا تا ہے۔ اور ایک نفل عبادت کا ثواب فرض عبادت کے برابر ہو جاتا ہے …. جبکہ ایک فرض کا اجر ستر گنا بڑھا دیا جاتا ہے۔ یہ وہ مہینہ ہے جس میں اللہ تعالیٰ کی رحمتیں اپنے عروج پر ہوتی ہیں اور وہ بندوں کی دعاؤں کو قبول فرماتا ہے۔ سحری او ر افطاری کی بڑی نعمتیں ہیں۔ سحری کھانے میں برکت اور جسمانی توانائی کا ذریعہ ہے ….. جبکہ افطار کے وقت اللہ تعالیٰ کی رحمت خصوصی طور پر نازل ہوتی ہے۔ نبی کریم صلعم نے فرمایا کہ روزہ دار کیلئے دو خوشیاں ہیں۔ ایک افطار کے وقت ….. اور دوسری اپنے رب سے ملاقات کے وقت۔ سائنسی تحقیقات سے ثابت ہو چکا ہے کہ روزہ رکھنے سے جسم میں کئی مثبت تبدیلیاں آتی ہیں۔ روزہ ڈیٹا کسیفیکشن (جسم سے زہریلے مادوں کا اخراج) میں مدد دیتا ہے، میٹا بولزم کو بہتر کرتا ہے اور دل کی صحت پر مثبت اثر ڈالتا ہے، جبکہ ذہنی سکون اور ڈپریشن کو کم کرنے میں بھی مد د گا ر ثابت ہوتا ہے۔ رمضان المبارک ہمیں سماجی ہم آہنگی اور مساوات کا درس دیتا ہے۔ اس مہینے میں غریبوں اور ناداروں کی مدد کا جذبہ بڑھ جاتا ہے، صدقات و خیرات میں اضافہ ہوتا ہے اور یتیموں، بیواؤں اور ضرورت مندوں کا خاص خیال رکھا جاتا ہے۔ روزہ ہمیں بھوکوں کی حالت کا احساس دلاتا ہے …… ہمیں سادگی اور قناعت پسندی سکھاتا ہے۔ رمضان کی سب سے بڑی فضیلت لیلتہ القدر ہے جو کہ ہزار مہینوں سے افضل رات ہے۔ قرآن کریم میں اللہ تعالیٰ فرماتا ہے کہ بے شک ہم نے اس (قرآن) کو شب ِ قدر میں نازل کیا ….. اور تمہیں کیا معلو م کہ شب قدر کیا ہے ؟ شب قدر ہزار مہینوں سے بہتر ہے۔ اس رات میں عبادت کرنے کا ثواب تراسی سال کی عبادت کے برابر ملتا ہے۔ اس لئے ہمیں چاہئے کہ ہم اس رات

کی تلاش میں زیادہ سے زیادہ عبادت کریں۔ رمضان المبارک ہم سے تقاضا کرتا ہے کہ ہم اپنی زندگیو ں میں مثبت تبدیلی لائیں۔ اگر ہم نے اپنے اعمال کو بہتر نہ بنایا، اپنی عبادات کو سنوارا نہیں اور اپنی نیتوں کو خالص نہ کیا تو ہم رمضان کی حقیقی برکتوں سے محروم رہیں گے۔ ہمیں چاہئے کہ اس مہینے کو گناہوں سے توبہ اور نیکیوں میں اضافے کیلئے استعمال کریں۔ رمضان المبار ک اللہ تعالیٰ کی طرف سے ایک عظیم نعمت ہے۔ یہ ہمارے لئے ایک موقع ہے کہ ہم اپنے گناہوں کی معافی مانگیں۔ اپنے اخلاق و کردار کو سنواریں اور زیادہ سے زیادہ نیکیاں کمائیں۔ اللہ تعالیٰ ہمیں اس مبارک مہینے کی برکتوں سے بھرپور فائدہ اٹھانے کی توفیق عطا فرمائے اور ہمیں حقیقی معنوں میں رمضان کی فیوض و برکات حاصل کرنے والا بنائے۔ آمین !