آخری چند دن دسمبر کے

نظم…. امجد اسلام امجد

آخری چند دن دسمبر کے
ہر برس ہی گراں گزرتے ہیں
خواہشوں کے نگار خانے میں
کیسے کیسے گماں گزرتے ہیں
رفتگاں کے بکھرتے سالوں کی

ایک محفل سی دل میں سجتی ہے
فون کی ڈائری کے صفحوں سے
کتنے نمبر پکارتے ہیں مجھے
جن سے مربوط ہے نوا گھنٹی
اب فقط میرے د ل میں بجتی ہے
کس قدر پیارے پیارے ناموں پر
رینگتی بدنما لکیریں سی
میری آنکھوں میں پھیل جاتی ہیں
دوریاں دائر ے بناتی ہیں
دھیان کی سیڑھیوں میں کیا کیا عکس
مشعلیں درد کی جلاتے ہیں
ایسے کاغذ پہ پھیل جاتے ہیں
حادثے کے مقام پر جیسے
خون کے سوکھے نشانوں پر

چاک کی لائنیں لگاتے ہیں
ہر دسمبر کے آخری دن میں
ہر برس کی طرح اب بھی

ڈائری ایک سوال کرتی ہے
کیا خبر اس برس کے آخر تک
میرے ان بے چراغ صفحوں سے
کتنے ہی نام کٹ گئے ہو نگے
کتنے نمبر بکھر کے رستوں میں
گرد ماضی سے اٹ گئے ہو نگے
خاک کی ڈھیریوں کے دامن میں
کتنے طوفان سمٹ گئے ہو نگے
ہر دسمبر میں سوچتا ہو ں
ایک دن اس طرح بھی ہونا ہے
رنگ کو روشنی میں کھونا ہے
ڈائری، دوست دیکھتے ہو نگے
ان کی آنکھوں کے خاکدانوں میں
ایک صحرا سا پھیلتا ہو گا
اور کچھ بے نشاں صفحوں سے
نام میرا بھی کٹ گیا ہو گا….